سوشل میڈیا پر سماجوادی پارٹی کے صدر اور سابق وزیرِ اعلیٰ اکھلیش یادو کی بیٹی کے بارے میں بڑے پیمانے پر فرضی خبریں پھیلائی جا رہی ہیں اور ان کے بارے میں کافی قابلِ اعتراض تبصرے بھی کیے جا رہے ہیں۔ اسی دوران کانگریس رکنِ پارلیمان عمران مسعود کا ایک بیان بھی شیئر کیا جا رہا ہے، جس میں مبینہ طور پر عمران مسعود نے اکھلیش یادو پر طنز کیا ہے۔
عمران مسعود کے مبینہ بیان والے وائرل پوسٹ کارڈ میں لکھا ہے، ’’ہمارے بابا صاحب نے ملک کی تمام بالغ لڑکیوں کو اپنی پسند کا لڑکا منتخب کرکے شادی کرنے کا حق دیا ہے، اب یہ لڑکیوں کی مرضی ہے کہ وہ کسی نائجیریائی سے شادی کرے یا پھر کسی پاکستانی سے۔‘‘ اس پوسٹ کارڈ کو شیئر کرتے ہوئے مسٹر تیاگی نامی صارف نے لکھا، ’’اکھلیش بھیا پر اس طرح کا طنز نہیں کرنا چاہیے تھا۔ بیٹی کسی کی بھی ہو، بیٹی ہی ہوتی ہے۔‘‘
اسی پوسٹ کی جواباً ٹرلوکی ناتھ چودھری (مودی کا پریوار) نامی ایک شخص نے عمران مسعود کے پوسٹ کارڈ کو شیئر کرتے ہوئے لکھا ہے، ’’جہادی سونی بات کسی کی ہو نظر لو جہاد پر رہتی ہیں۔‘‘
فیکٹ چیک:
ڈی ایف آر اے سی کی ٹیم نے جانچ میں پایا کہ عمران مسعود نے اکھلیش یادو کی بیٹی پر ایسا کوئی بیان نہیں دیا ہے اور ان کا فرضی بیان سوشل میڈیا پر شیئر کیا گیا ہے۔ جانچ کے دوران ہم نے پایا کہ وائرل پوسٹ کارڈ پر نو بھارت ٹائمز (این بی ٹی) کا لوگو لگا ہے۔ اس کے بعد ہم نے این بی ٹی کے سوشل میڈیا ہینڈلز کو دیکھا۔ ہم نے پایا کہ عمران مسعود کا حال ہی میں ایک پوسٹ کارڈ شائع ہوا ہے، جس میں ان کا راہل گاندھی کے بارے میں بیان دیا گیا ہے۔ اس کے علاوہ ہمیں اکھلیش یادو یا ان کی بیٹی کے حوالے سے عمران مسعود کا کوئی بیان نہیں ملا۔
مزید جانچ کے لیے ہم نے عمران مسعود سے رابطہ کیا۔ عمران مسعود نے وائرل بیان کو مکمل طور پر فرضی قرار دیا۔ انہوں نے ڈی ایف آر اے سی کو بتایا کہ وہ بیٹیوں کا احترام کرتے ہیں، ان کی اپنی بھی ایک بیٹی ہے اور وہ کبھی بھی اکھلیش یادو یا کسی اور کی بیٹی کے بارے میں اس طرح کا غیر شائستہ تبصرہ نہیں کر سکتے۔ انہوں نے اکھلیش یادو کی بیٹی کو اپنی بیٹی کی طرح قرار دیا۔
نتیجہ:
ڈی ایف آر اے سی کے فیکٹ چیک سے واضح ہے کہ وائرل دعویٰ مکمل طور پر فرضی ہے۔ عمران مسعود نے اکھلیش یادو کی بیٹی کے بارے میں کوئی توہین آمیز یا غیر شائستہ تبصرہ نہیں کیا ہے۔ مزید یہ کہ نو بھارت ٹائمز (این بی ٹی) نے بھی عمران مسعود کے اس فرضی بیان کا کوئی پوسٹ کارڈ شائع نہیں کیا ہے۔
